Zvicra prezanton fanellën e re për Kupën e Botës, frymëzuar nga pasaporta kombëtare, transmeton albinfo.ch.
Kombëtarja e Zvicrës në futboll ka zbuluar fanellën zyrtare që do të përdorë në Kupën e Botës, e cila do të zhvillohet verën e ardhshme në Shtetet e Bashkuara të Amerikës. Përmes një videoje të publikuar në rrjetet sociale, federata zvicerane prezantoi uniformën e re, e cila është dizajnuar mbi bazën e elementeve vizuale të pasaportës zvicerane.
Fanella kombinon elementet tradicionale me një stil modern, duke reflektuar identitetin kombëtar dhe historinë e vendit. Motoja zyrtare e kësaj rrobe sportive është “E kuqja jonë, krenaria jonë”, simbol i unitetit dhe frymës kombëtare, transmeton tutje albinfo.ch.
Kapiteni i përfaqësueses, Granit Xhaka u shpreh se dizajni i ri përfaqëson më shumë sesa thjesht një fanellë:
“Detajet e fanellës më kujtojnë nga vijmë dhe çfarë përfaqësojmë: një Zvicër që mund të arrijë gjëra të mëdha përmes unitetit dhe vendosmërisë”.
Përveç Xhakës, pjesë e prezantimit ishin edhe mbrojtësi Nico Elvedi dhe sulmuesi Dan Ndoye.
Tani e gjithë vëmendja e ekipit të drejtuar nga trajneri Murat Yakin është te shorti që do të mbahet të premten, ku do të mësohen kundërshtarët në fazën e grupeve./Albinfo.ch
