Gjykata Supreme në Kosovë ka konfirmuar se ka pranuar gjashtë ankesa pas përfundimit të rinumërimit lidhur me rezultatin e zgjedhjeve të 28 dhjetorit.
Sipas njoftimit, dy ankesa janë bërë nga kandidati i Partisë Demokratike të Kosovës (PDK), Bekim Haxhiu, një nga Partia Rome e Bashkuar e Kosovës, një nga koalicioni PAI-PDAK-LPB, një nga Emilia Rexhepi dhe një nga Partia e Re Demokratike (Nova Demokratski Stranka, Prizren), transmeton albinfo.ch.
Gjykata Supreme ka afat pesë ditë për vendosjen e këtyre ankesave, të cilat ishin refuzuar nga Paneli Zgjedhor për Ankesa dhe Parashtresa, dhe pas përfundimit të këtij afati i hapet rruga certifikimit të rezultateve.
Pas certifikimit, brenda 30 ditësh duhet të thirret seanca për konstituimin e Kuvendit.
