Presidenti zviceran, Ueli Maurer, të premten, më 22 shkurt, priti presidentin bullgar, Roumen Radev, në Meiringen, të Kantonit të Bernës. Gjatë bisedimeve zyrtare ata i diskutuan marrëdhëniet midis Zvicrës dhe Bullgarisë, si dhe politikën europiane, shkruajnë mediat zvicerane, përcjell Albinfo.ch.
Të dy krerët e shtetit mirëpritën lidhjet ndërmjet dy vendeve, të cilat janë thelluar në vitet e fundit. Diskutimet u përqëndruan gjithashtu në bashkëpunimin në kontekstin e kontributit të Zvicrës në zgjerimin e BE-së, ndërsa Zvicra siguroi mbështetje për krijimin e një sistemi të trajnimit profesional në Bullgari.
Presidenti i Konfederatës paraqiti gjendjen e marrëdhënieve midis Zvicrës dhe BE-së. Ai gjithashtu diskutoi me homologun e tij bullgar për hapat e ardhshëm për hyrjen e Bullgarisë në zonën Schengen. Përderisa vendimi përfundimtar qëndron në shtetet e BE-së, Zvicra po ndihmon Bullgarinë gjithashtu në përgatitjen për pranim.
Presidenti Maurer dhe presidenti Radev, ish-komandant i Forcës ajrore bullgare, vizituan bazën ajrore në Meiringen, ku morën pjesë në një stërvitje paralajmëruese.
