Shqipëria po konsolidohet si një nga destinacionet turistike më të preferuara në Europë, falë vijës bregdetare, natyrës së larmishme, çmimeve konkurruese dhe një imazhi gjithnjë e më të fortë në tregjet ndërkombëtare.
Përtej numrit në rritje të vizitorëve, vëmendja po zhvendoset te ndikimi real ekonomik i turizmit. Pyetja kryesore mbetet: sa para po qarkullojnë realisht në ekonominë shqiptare nga turistët e huaj?
Sipas të dhënave të Bankës së Shqipërisë, gjatë 9 muajve të parë të vitit 2025, të ardhurat nga turizmi arritën në 4.4 miliardë euro. Mesatarisht, çdo turist i huaj ka shpenzuar rreth 431 euro gjatë qëndrimit në vend. Ekspertët vlerësojnë se kjo rritje është kryesisht pasojë e rritjes së çmimeve dhe rënies së kursit të euros, dhe jo domosdoshmërisht e konsumit më të lartë.
“Ka një rritje të dukshme në shifra, por jo domosdoshmërisht në vlerë reale. Inflacioni dhe dobësimi i euros kanë ndikuar drejtpërdrejt në nivelin e shpenzimeve,” shprehet Feriold Ozuni, ekspert i turizmit.
Operatorët turistikë e konsiderojnë vitin 2025 si një sezon shumë të mirë, edhe për shtrirjen e turizmit gjatë gjithë vitit. Megjithatë, bizneset po fokusohen gjithnjë e më shumë te fitimi real, pasi kostot janë rritur dhe marzhet janë ngushtuar.
Nga ana tjetër, bilanci i udhëtimeve tregon se shqiptarët kanë shpenzuar më shumë jashtë vendit. Në 9 muaj, pushimet e shqiptarëve jashtë Shqipërisë arritën në 2.3 miliardë euro, me një rritje prej 10.2% krahasuar me një vit më parë.
Edhe pse turizmi mbetet një nga motorët kryesorë të ekonomisë shqiptare, ekspertët theksojnë se sfida kryesore nuk është më numri i turistëve, por sa vlerë reale mbetet në vend.
TË DHËNAT KRYESORE TË TURIZMIT
(Burimi: Banka e Shqipërisë)
Të ardhurat nga turizmi
9-mujori 2024: 3.8 miliardë euro
9-mujori 2025: 4.4 miliardë euro
Shpenzimet mesatare për turist
9-mujori 2024: 398 euro / person
9-mujori 2025: 431 euro / person
Pushimet e shqiptarëve jashtë vendit
9-mujori 2025: 2.3 miliardë euro
Ndryshimi vjetor: +10.2%
