Universiteti i Prizrenit, i Mitrovicës dhe ai i Pejës nuk do të mund të pranojnë studentë për këtë vit, përcjell albinfo.ch.
Kjo për shkak se Këshilli Shtetëror për Cilësi (KSHC) nuk i ka akredituar për sivjet, përfshirë edhe disa kolegje private.
Pas këtij njoftimi, në disa media të Kosovës qarkulloi lajmi për “mbylljen e këtyre tri universiteteve”. Organizata për Rritjen e Cilësisë në arsim ka reaguar ndaj këtyre lajmeve, duke sqaruar se bëhet fjalë vetëm për mosakredtitim.
“ORCA si organizatë monitoruese e KSHC-së sqaron mediet dhe publikun se Universitetet e Prizrenit, Pejës dhe Mitrovicës nuk mbyllen, mirëpo atyre nuk u lejohet regjistrimi i studentëve për këtë vit, ndërkohë që ato mund të aplikojnë sërish vitin e ardhshëm”, thuhet në njoftimin e ORCA-s.
Kurse kryeministri i Kosovës, Ramush Haradinaj, këtë vendim të KSHC-së e ka vlerësuar si të papranueshëm, teksa ka paralajmëruar se do të marrë masa për “zgjidhjen e kësaj situate”.
Edhe kryeministri Haradinaj, mosakreditimit të këtyre tri universiteteve, i është referuar si mbyllje.
“Është i papranueshëm vendimi i Këshillit Shtetëror të Cilësisë për mbylljen e tri universiteteve publike; atij në Pejë, në Mitrovicë dhe në Prizren. Si kryeministër i vendit, e konsideroj të padrejtë mohimin e mundësisë për regjistrim të studentëve, duke ua humbur atyre vitin. Ndaj këtij rasti do të veprojmë menjëherë, duke ndërmarrë hapa konkretë në zgjidhjen e kësaj situate”, ka shkruar Haradinaj në Facebook.
