Presidenti i Kosovës, Hashim Thaçi ka bërë të ditur se ai dhe homologu i tij nga Mali i Zi, Filip Vujanoviq kanë nxjerrë një deklaratë të përbashkët për shënjimin e kufirit mes të dyja vendeve.
“Kosova ka marrë obligime që ka nënshkruar, qoftë për themelimin e Asociacionit edhe nënshkrimin e marrëveshjes për Demarkacionin mes Kosovës dhe Malit të Zi”, ka thënë presidenti Thaçi, përcjell albinfo.ch.
“Duke vlerësuar edhe momentin e mirë të autoriteteve të Malit të Zi dhe vullnetin e lidershipit kosovar dua të shpalos se në 48 orët e fundit dhe përpjekjet e pandërprera tash e dy vjet e gjysmë unë si president i Kosovës dhe presidenti i Malit të Zi, Filip Vujanoviq nxorëm një deklaratë të përbashkët që inkurajojmë Kuvendin e Kosovës që të ratifikojë marrëveshjen mbi kufirin shtetëror që është nënshkruar në Vjenë”, ka shtuar tutje presidenti i Kosovës.
I pari i vendit në një konferencë për media ka thënë se “kjo deklaratë e përbashkët është bazuar, nisur nga besimi i ndërsjellë dhe vullneti i mirë sikur edhe nevojat për avancimin e partneritetit strategjik por duke respektuar sovranitetin dhe integritetin territorial”.
“Kjo deklaratë e përbashkët e dy presidentëve, u bën thirrje organeve kompetente që të përmbyllet ratifikimi. Do të kemi trupë të përbashkët për shënjimin e vijës kufitare, ky grup punues nëse paraqitet nevoja do të shqyrtojë të gjitha mundësitë për përkushtimet e përbashkëta”.
