Kryeministri i Shqipërisë, Edi Rama, ka zgjedhur një fotografi të mikut të tij, presidentit të Kosovës, Hashim Thaçi, për ta uruar popullin e Kosovës për ushtri.
I pari i Qeverisë shqiptare ka publikuar në faqen e tij zyrtarë në Facebook fotografinë e Thaçit me uniformë.
Kreu i Partisë Demokratike, Lulzim Basha nxitoi të uronte Kosovën për formimin e ushtrisë.
“Urime Kosovë për Ushtrinë!”, niste mesazhi i tij në rrjetin social Twitter, përcjell albinfo.ch.
“Pas Pavarësisë, ngjarja e dytë e përmasave kombëtare dhe historike. Me ushtrinë e saj, Kosova do të jetë më e sigurt, rajoni më në paqe, kombi shqiptar i integruar dhe më i fortë. Nderim të rënëve për liri, mirënjohje miqve të mëdhenj që na mbështetën!”, shkruan Basha.
Pas votimit nga deputetët e Kuvendit të Kosovës për formimin e Ushtrisë së Kosovës, një përkrahje e madhe ka ardhur nga presidenti i Shqipërisë, Ilir Meta.
Meta zgjodhi rrjetin social Facebook për të uruar politikën e Kosovës që bëri të mundur formimin e ushtrisë së saj.
Po ashtu Meta këtë e ka quajtur si vendim historik të Kosovës që dëshmon qartë se ky vend është i aftë të marrë përgjegjësi të reja për të kontribuar paqes, stabilitetit në rajon.
