Kryeqyteti i Kosovës, Prishtina, edhe këtë vit ka ndaluar përdorimin e fishekzjarreve në vendet e hapura publike, përkatësisht në sheshe, tregje dhe rrugë.
Lajmin e ka bërë të ditur përmes një vendimi kryetari i Prishtinës, Përparim Rama.
Por, deri tani në Kosovë janë futur rreth 120 tonë mjete piroteknike.
Në Doganën e Kosovës kanë treguar se mjetet piroteknike janë ato të cilat janë importuar më së shumti sa i përket sasisë, peshës dhe çmimit.
Krahasuar me vitin e kaluar numri i produkteve piroteknike ka qenë 40 mijë kilogramë, këtë vit është rritur në 120 mijë kilogramë.
“Gjatë vitit të kaluar, më 2021, në total ka qenë importi i përgjithshëm i mjeteve piroteknike rreth 40 mijë kilogramë, ndërsa këtë vit kemi një rritje nga 40 mijë në 120 mijë kilogramë të importuara, të cilat në aspektin e vlerës kanë shënuar rritje për shkak se kilogrami i mjeteve piroteknike është importuar rreth 1 euro. Tani kemi një rritje të dukshme të çmimeve dhe për momentin kemi rreth 220 mijë euro të importuara vlerë të këtyre produkteve, e taksat e grumbulluara për këtë import të produkteve kalojnë 350 mijë euro, për shkak se secili import i mjeteve piroteknike tatohet përveç taksave të zakonshme, edhe me 2 euro akcizë për kilogram dhe kjo manifeston edhe në rritjen e saj”, thonë nga dogana.
