Kuvendi i Kosovës është duke mbajtur një seancë solemne për nder të 14 vjetorit të Pavarësisë.
Presidentja e Kosovës gjatë fjalës së saj tha se Pavarësia e Kosovës hapi kapitull të ri jo vetëm “për ne, por edhe për globin”.
Sipas Osmani, rruga deri te ky akt nuk ishte e lehtë.
Osmani tutje ka falënderuar të gjithë ata që sakrifikuan për lirinë e vendit tonë, ndërsa ka përmendur edhe aleatët e Kosovës që ndihmuan për lirinë e vendit edhe në vitin 1999, por që vazhdojnë ta mbështesin Kosovën edhe sot.
Ajo tha se liria e Kosovës u dedikohet edhe vendeve mike, duke thënë se pa to nuk mund të finalizohet rruga evropiane e këtij vendi dhe anëtarësimi në organizata ndërkombëtare.
“Kosova sot nuk është as ajo e qershorit të vitit 1999 dhe as ajo e shkurtit të vitit 2008. Megjithatë, liria jonë ende nuk është përmbushur, sepse sot kujtojmë edhe mbi 1,600 të zhdukur me dhunë, zbardhjen e fatit të të cilëve po e mban peng Serbia. Por, një është e sigurt. Nuk do të pushojmë asnjë çast derisa familjet e tyre të gjejnë qetësinë”, ka deklaruar Osmani.
Ajo ka thënë se procesi me Serbinë do të përfundojë me njohjen reciproke:
“Nuk do të lejojmë në asnjë mënyrë që ky proces t’i shkaktojë kokëçarje shtetit tonë, dhe rrjedhimisht nuk do të pranojmë asnjë opsion që synon defunksionalizimin e shtetit tonë”.
