Etrit Hasler është një personalitet i njohur shqiptaro-zviceran nga St. Galleni, Zvicra lindore. Si politikan dhe artist i profiluar tashmë, ai i tejkalon kufijtë e regjionit ku jeton. Prej vitesh Hasler merret me politikë, gazetari dhe me gjininë specifike të poezisë “slam poetry”. Me këtë të fundit, Etriti, që është biri i një shqiptari dhe një zviceraneje, zë një vend nderi në nivel të Zvicrës.
Në sferën politike ai ka një bagazh të rëndësishëm të këshilltarit në Kuvendin e qytetit të St. Gallenit. Ndërsa tash Hasler synon vendin e këshilltarit në nivel kantoni.
Për të mbështetur këtë synim, në St. Gallen është themeluar një grup përkrahës i kandidaturës së tij. Në një letër dërguar medieve shqiptare ky grup bën të ditur se më 11 mars të këtij viti do të mbahen zgjedhjet për Parlamentin e Kantonit të St. Gallenit. Në qarkun e St. Gallenit do të garojë edhe Partia Socialdemokrate e Zvicrës.
“Në listë të kësaj partie është edhe kandidati Etrit Hasler, i cili me angazhimin dhe guximin e tij, ka bërë që shpeshherë të jetë krah i fuqishëm i të huajve në Zvicër, dhe padyshim krah i forte edhe i komunitetit shqiptar”, thuhet më tej në letër.
Në vazhdim, ecuria që duhet ndjekur për të votuar, sipas grupit në fjalë. “Etrit Haslerin ju mund ta votoni 2 herë. Votimi bëhet duke shkruar emrin e tij në fund të listës përkatëse, së bashku me numrin rendor, dhe duke fshirë me një vijë stilolapsi – tej e përtej, një emër të një kadidati tjetër nga lista. Nëse i lexoni me kujdes emrat e kandidatëve, dhe pasi t`i keni lexuar të gjithë emrat, nuk do ta keni të vështirë ta gjeni emrin që duhet… Para 4 vitesh, Etritin, pak vota e ndanin për të zënë vend në parlament.
Kësaj radhe, me angazhim të të gjithëve nga pak, do të bëjmë që përmes Etritit, të kemi një gjysmë zëri shqiptar në Parlamentin e Kantonit St. Gallen”, thuhet në letrën që ka dërguar Grupi për mbështetjen e kandidaturës së Etrit Haslerit. Për mbështetje më konkrete, të interesuarit mund të kontaktojnë në Tel.: 076 269 35 00
