Sipas kryeministri Hashim Thaçi, Kosova rangohet në shkallë të njëjtë me disa shtete të Bashkimit Evropian dhe vende anëtare të NATO-s sa i përket trafikimit me njerëz.
Autoritet kosovare të mbështetura edhe nga institucionet ndërkombëtare të akredituara në Kosovë kanë marrë angazhime shtesë për të luftuar trafikimin me qenie njerëzore. Ky fenomen i cilësuar si “skllavëria moderne” ka marrë përmasa shqetësuese nëpër vendet e rajonit, pa përjashtuar këtu edhe Kosovën.
Që kjo çështje të eliminohet autoritetet vendore dhe ato ndërkombëtare e zyrtarizuan fushatën me moton “Muajin Kundër Trafikim”.
Zëvendësministri i Punëve të Brendshme, njëkohësisht Koordinator Nacional Kundër Trafikim, Sasa Rashiq tha se trafikimi me njerëz është fenomen i karakterit global, të cilit nuk i shmanget Kosova dhe është një formë e krimit të organizuar prezent, ku prek direkt apo indirekt të gjithë shoqërinë kosovare.
“Kjo formë e krimit të organizuar në pjesën më të madhe të shoqërisë prek fëmijët dhe gratë, ku janë më së shpeshti viktima të këtij krimi të rëndë, i cili e dehumanizon dhe i shkel të drejtat elementare të njeriut dhe dinjitetin e tij”, tha Rashiq, sipas të cilit, kjo kampanjë synon të arrijë një efekt afatgjatë në vetëdijesimin dhe sensibilizimin e opinionit.
Ndërsa kryeministri Hashim Thaçi, tha se Qeveria e Kosovës ka treguar që është e angazhuar në luftën kundër trafikimit me qenie njerëzore, këtë gjë e provon edhe renditja e shtetit të Kosovës në raportin vjetor kundër trafikimit me qenie njerëzore që publikohet nga Departamenti Amerikan i Shtetit.
Kosova në këtë raport, sipas Hashim Thaçit, rangohet në shkallë të njëjtë edhe me disa shtete të Bashkimit Evropian dhe vende anëtare të NATO-s.
“Kosova dhe institucionet e saj mbeten të përkushtuara që të luftojnë këtë dukuri negative dhe të arrijnë rezultate edhe më të mëdha. Qeveria e Kosovës do të ndërmerr të gjithë hapat e duhur të reformojë policinë, legjislacionin përkatës, dhe të forcojë sundimin e ligjit, në mënyrë që të jemi më të përgatitur t’u përgjigjemi sfidave që dalin në luftimin e dukurive negative të krimit të organizuar”, tha kryeministri Thaçi.
Ndërsa ambasadorja amerikane në Kosovë, Tracey Jacobson tha se institucionet e Kosovës kanë bërë hapa të mëdhenj në përmirësimin e situatës në luftimin kundër trafikimit. “…ka ende punë për tu bërë, hetimet më efektive nga policia dhe përmirësimi i përkujdesjes ndaj viktimave nuk kanë domethënie nëse keqbërësit nuk ndiqen penalisht dhe dënohen”, tha Jacobson.
Shefi i Zyrës së BE-së në Kosovë, Samuel Zhbogar, ndërkaq tha se trafikimi me qenie njerëzore është një lloj i skllavërisë moderne, ku gjithmonë preken grupet më të ndjeshme, siç janë fëmijët, prandaj fushata e këtij viti në Kosovë përqendrohet drejtë fëmijëve.
“Luftimi i trafikimit me qenie njerëzore është prioritet kryesor si politik ashtu edhe i agjendës tonë për Kosovën dhe ne në punët tona i përkrahim institucionet e Kosovës dhe Koordinatorin Nacional Kundër Trafikimit në mënyrë që t’i dizajnojmë politikat dhe rregullat që janë për përmirësimin ndaj luftës së kësaj dukurie”, theksoi Zhbogar.
