Një nënë 36-vjeçare nga Fieri, e cila kishte lindur binjakë më 11 shkurt, ka ndërruar jetë në Sanatoriumin e Tiranës, e prekur nga virusi i gripit AH1N1.
Ngjarja ka ndodhur të dielën, por është bërë e ditur vetëm sot, pasi nëna kishte dy javë e shtruar në spital, shkruajnë mediat shqiptare.
Për shkak të gjendjes së rënduar, mjekët u detyruan të provonin lindje të parakohshme të dy foshnjave, përcjell albinfo.ch.
Një prej tyre humbi jetën si pasojë e lindjes së parakohshme, pas vetëm 31 javësh shtatzëni në Maternitetin “Koço Gliozheni”.
Pas vdekjes së gruas shtatzënë në spitalin e Sanatoriumit, e cila dyshohet se ishte e prekur nga virusi AH1N1, ka reaguar shefja e reanimacionit në Sanatorium, Alma Cani.
“Rasti konkret në fakt ishte një grua shtatzënë, 31 javëshe, e ardhur në datën 9 shkurt në spitalin tonë, u paraqit pas një gjendje të gripit. U fut direkt në terapi intensive, kishte probleme në frymëmarrjen. Duke qenë se situata ishte e vështirë, u detyruam që të bënim lindjen e parakohshme. Ishte me binjakë dhe u realizuar në spitalin tonë lindja bashkë me kolegët e maternitetit Koço Gliozheni. Njëri nga fëmijët ndërroi jetë ndërsa tjetri jeton. Gruaja vazhdoi me asistencën në reanimacion. Me gjithë përpjekjet që u bëmë, nuk mundëm dot ta kalojmë. Në 25 shkurt pacientja ndërroi jetë”, deklaroi Cani.
Mjekja e spitalit “Shefqet Ndroqi”, Alma Cani, u bëri apel të gjitha grave shtatzënë që të tregohen të kujdeshme ndaj virozave, pasi janë më të ndjeshme që të preken nga gripi.
