Sipas udhëzimeve të reja mjekësore, shumë të rritur mund të përfitojnë nga fillimi i trajtimit për uljen e kolesterolit më herët se zakonisht, për të zvogëluar rrezikun e atakut në zemër dhe të goditjes në tru.
Kolegji Amerikan i Kardiologjisë dhe Shoqata Amerikane e Zemrës, së bashku me nëntë organizata të tjera mjekësore, nënvizojnë në guidën e re se fillimi i trajtimit për kolesterol të lartë në të 30-at mund të ulë ndjeshëm rrezikun kardiovaskular gjatë jetës.
Udhëzuesi i përditësuar, i cili ka 123 faqe, përfshin mënyra të ndryshme për menaxhimin e kolesterolit dhe triglicerideve, por një mesazh kryesor është: veproni sa më shpejt.
Statinet rekomandohen, krahas ndryshimeve në stilin e jetës si dieta dhe aktiviteti fizik, për të rriturit që nga mosha 30 vjeç me kolesterol LDL mbi 160 mg/dl, histori familjare të sëmundjeve të zemrës ose rrezik të lartë për sëmundje kardiovaskulare gjatë 30 viteve të ardhshme.
“Tradicionalisht, ne vlerësonim rrezikun 10-vjeçar, i cili zakonisht është i ulët për të rinjtë. Por tani po shohim se duhet të parashikojmë rrezikun për 30 vite”, thotë Dr. Jennifer Haythe nga Qendra e Zemrës së Grave në Universitetin NewYork-Presbyterian/Columbia. Ajo shton se ekspozimi i gjatë ndaj LDL të ulur sjell përfitime reale në parandalimin e akumulimit të pllakave në arterie.
Në Shtetet e Bashkuara, numri i personave të moshës 30–44 vjeç është rreth 65–70 milionë. Edhe një pjesë e vogël me LDL mbi 160 mund të përfitojë nga kriteret e reja, duke përfshirë miliona individë.
Vendimi për të filluar trajtimin duhet bërë së bashku me mjekun, duke marrë parasysh rrezikun afatgjatë dhe përfitimet e mundshme.
