Më shumë se 80 për qind e kapaciteteve hoteliere në Kosovë vazhdojnë të mesin të zbrazëta. Kështu thuhet në raportin e fundit të Agjencisë së Statistikave të Kosovës (ASK) publikuara të mërkurën lidhur me Statistikat e Hotelerisë në Kosovë për tremujorin e tretë (TM3) 2016.
Në tremujorin e tretë të vitit 2016 pjesë e anketës ishin 109 hotele, që ushtrojnë veprimtari hoteliere në territorin e Kosovës. Pjesa më e madhe e hoteleve, sipas ASK-së, gjenden në rajonin e Prishtinës, Pejës, Ferizajt etj.
Sipas anketës, kapaciteti i shfrytëzuar në nivel vendi ishte 16.31 për qind.
Gjatë muajve korrik, gusht dhe shtator, numri i vizitorëve ishte 36 872, prej tyre 29.23 për qind ishin vizitorë vendorë dhe 70.7 për qind ishin vizitorë të jashtëm. “Kurse, numri i bujtjeve në TM3 2016 ishte 56 558, ku 27.21% e bujtjeve ishin nga vendorët dhe 72.79% nga të huajt:, thuhet në raport.
Numrin më të madh të vizitorëve dhe netëqëndrimet, sipas ASK-së, e ka pasur rajoni i Prishtinës me 19 638 vizitorë dhe 31 326 netëqëndrime.
“Numri më i madh i vizitorëve të huaj përqendrohet në Prishtinës, Pejës etj. Kurse, sa u përket vizitorëve të huaj, numri më i madh ishte nga Shqipëria, Gjermania, Zvicra, etj”, thuhet në raport.
