Qeveria e Kosovës e ka humbur arbitrazhin në rastin me kompaninë “Contour Global”, duke u detyruar kështu të paguajë një dëmshpërblim prej mbi 20 milionë euro.
Këtë e ka konfirmuar për Kallxo.com Arsim Zuka, avokat në Avokaturën Shtetërore, përcjell Albinfo.ch.
“Avokatura Shtetërore e ka pranuar vendimin final të Gjykatës Ndërkombëtare të Arbitrazhit, (ICC)”, ka thënë ai.
Vendimi i arbitrazhit e obligon Republikën e Kosovës që t’ia paguajë ‘Contour Global’-it shumën prej 20,053,125.63 euro”, ka shtuar Zuka.
Ai ka thënë që këtë vendim do të sfidojnë.
“Avokatura Shtetërore dhe përfaqësuesi ligjor i kontraktuar e kanë analizuar vendimin final të arbitrazhit dhe i njëjti do të sfidohet në gjykatën civile në Mbretërinë e Bashkuar”, ka theksuar Zuka.
“Contour Global” ka qenë kompania amerikane, e cila pati marrë përsipër ndërtimin e termocentralit me qymyr “Kosova e re”.
Në mars të viti 2020 kompania kishte njoftuar se do të tërhiqet nga ky projekt, me arsyen se kompania nuk e ka ndërmend të ndërtojë projekte me thëngjill në të ardhmen, por po ashtu kshin theksuar edhe ndryshimet politike që kishin ndodhur në Kosovë.
Investitori “Contour Global” përveç ishte tërhequr nga ndërtimi i termocentralit, e kishte paditur Kosovën edhe në Gjykatën e Arbitrazhit Ndërkombëtar për mosrespektim të kontratës.
Kontrata me “Contour Global” është nënshkruar nga Qeveria Haradinaj në dhjetor të vitit 2017./Albinfo.ch
