Në Bruksel të martën mbahet takimi i radhës i dialogut Kosovë-Serbi. Zyrtarë të Bashkimit Evropian janë angazhuar që të gjendet një zgjidhje e pranueshme për të dyja palët rreth bashkëpunimit rajonal.
Zyra e ndërmjetësit Robert Copper i ka njoftuar të dy delegacionet se do të bisedohet edhe për protokollin teknik për menaxhimin e integruar të kufijve, bashkëpunimin rajonal si dhe zbatimit të marrëveshjeve.
Kryeministri, Hashim Thaçi, ka mbështetur modelin, sipas të cilit, Kosova, në nismat rajonale, do të përfaqësohej me Deklaratën e Pavarësisë, opinionin e Gjykatës Ndërkombëtare të Drejtësisë si dhe me Rezolutën 1244 të Kombeve të Bashkuara.
“Ky model është i balancuar, meqë merr parasysh dy realitetet ekzistuese, atë të Kosovës së pavarur dhe atë të Serbisë që nuk e njeh shtetësinë e saj”, ka deklaruar Thaçi.
Por, kreu i ekipit serb në bisedimet me Kosovën, Borisllav Stefanoviq, ka thënë se për Serbinë është e papranueshme çdo zgjidhje e cila përmend Deklaratën e Pavarësisë së Kosovës.
Ai ka konfirmuar se ekipi i tij do të udhëtojë në Bruksel për vazhdimin e dialogut, duke theksuar se për Beogradin është e pranueshme zgjidhja ku përmendet Rezoluta 1244 e OKB-së, mendimi këshillëdhënës i GJND-së, por ajo edhe Deklarata për Pavarësinë e Kosovës.
