Skënderbeu arriti barazim historik me Dinamon e Zagrebit, derisa përveç barazimit shumë zhurmë u bë rreth komenteve të komentatorit kroat, Stjepan Balog, i cili kishte thënë se ka kaluar koha kur shqiptarët ishin shitës akulloresh.
Megjithatë, ai u kritikua shumë rreth këtyre komenteve. Por, komentatori kroat ka kërkuar falje, duke u shprehur se nuk kishte menduar të ofendojë shqiptarët.
“U kërkoj falje të gjithëve dhe nuk dëshiroj që fraza e gabuar të ndikojë në miqësinë e mirë mes dy popujve. Unë e di shumë mirë që shumë shqiptarë kanë luftuar për lirinë e Kroacisë”, është shprehur Balog.
Komentatori kroat është shprehur se gjithçka është keqkuptuar dhe sipas tij, gabimet e gjyqtarit të takimit i mohuan fitoren skuadrës së Skënderbeut.
