Kështu po festohen Pashkët nga besimtarët katolikë shqiptarë në Zvicër

Festa e Pashkëve që është festa më e rëndësishme e besimtarëve katolikë, është shënuar edhe nga shqiptarët e këtij besimi, në Zvicër. Kjo festë shënon ringjalljen e Jezusit të Nazaretit (Jezu Krishtit), që ka ndodhur, sipas Besëlidhjes së Re, tri ditë pas vdekjes së tij në kryq.

Në të tre misionet katolike shqiptare: Thurgau, Luzern dhe Aarau, janë mbajtur meshët përkatëse të drejtuara nga priftërinjtë, udhëheqës të misioneve dhe ceremonitë e tjera kushtuar kësaj feste.

Krahas meshëve, janë edhe ritualet e bukura, si bekimi i bukës (ushqimeve) dhe ndezja simbolike e qirinjve në kisha, si simbol i ringjalljes së Jezu Krishtit, që i shtojnë bukurinë kësaj feste.

Aktivitetet festive të filluara të Premten e Madhe dhe të Shtunën e Madhe do të vazhdojnë edhe sot dhe nesër, të hënën, kur përmbyllet festa e Pashkëve.

Në prani të një numri të madh besimtarësh, Pashkët janë shënuar në një atmosferë festive dhe me përkushtimin që kërkon kjo festë.

Albinfo.ch sjell në vazhdim disa pamje nga festa e Pashkëve në tri misionet katolike shqiptare.