Autoritetet e Kosovës kanë kundërshtuar mundësinë që modeli i bashkëpunimit midis dy Gjermanive, i përmendur nga presidenti serb, Boris Tadic, të mund të aplikohet edhe në raportet Kosovë-Serbi.
Ministri i Punëve të Jashtme, Enver Hoxhaj, në një prononcim për Kohën Ditore, e ka quajtur model të luftës së ftohtë, që nuk mund të jetë shembull për përmirësimin e ndonjë raporti në Ballkan.
Ndërsa ish-ministri i Jashtëm, Skender Hyseni ka thënë se modeli në themel nënkupton që një ditë Kosova dhe Serbia do të mund të bashkoheshin.
Profesori i të drejtës ndërkombëtare, Afrim Hoti ka thënë se, që modeli të implementohet, nuk është e thënë të ketë bekimin e dyja palëve.
Por, ideatori i këtij modeli, diplomati gjerman Wolfgang Ischinger, edhe tash mendon se këtë duhet aplikuar të dyja vendet. Pas fillimit të dialogut teknik Kosovë-Serbi, ai ka ftuar Gjermaninë që të dalë me nisma të reja për Kosovën.
Diplomati Ischinger, që ishte përfaqësues i BE-së në Trojkën ndërkombëtare në bisedimet shtesë, ka thënë se ideja mirëpritet jo vetëm në rajon, BE dhe SHBA, por, ndoshta, ka gjasa që të pranohet, madje, edhe nga Rusia.
