Kryesia e Lidhjes Demokratike të Kosovës (LDK) në mbledhjen e sotme diskutoi për përgatitjet teknike rreth procesit të brendshëm zgjedhor, ndërsa me vendim të shumicës së anëtarëve, anuloi kuvendet zgjedhore të degës në Gjermani, Zvicër si dhe në komunën e Kllokotit.
“Kryesia vendosi që zgjedhjet në degët e LDK-së Gjermani, LDK Zvicër dhe në Kllokot të përsëriten, për shkak të parregullsive të konstatuara, përkatësisht mosmbajtjes së Kuvendeve zgjedhore, në nëndegët e degëve të lartpërmendura”, thuhet në komunikatën e lëshuar nga LDK.
Kryesia gjithashtu kërkoi nga degët që zgjedhjet të mbahen pas Kuvendit të Tetë Zgjedhor të LDK-së, në përputhje me rregulloret për zgjedhje në nivel nëndege dhe dege, si dhe me pjesëmarrje të anëtarëve të Kryesisë Qendrore.
Ndryshe, për çështjen e parregullsive dhe pakënaqësive që janë shfaqur në degën e LDK-së në Zvicër ka raportuar edhe Albinfo.Ch. Ishte Arif Baftiu qi që kërkon anulimin e Kuvendit “për shkak të parregullsive që kanë ndodhur”. Ai dhe disa të tjerë e kontestuan zgjedhjet e Shefqet Dibranit, kryetar të Degës së LDK-së në Zvicër.
Nga burime të saj Albinfo.Ch merr vesh se në Kuvend ka pasur fërkime mes krahut të Isa Mustafës dhe të Fatmir Sejdiut. Sipas tyre, ka pasur intriga e parregullsi në mbarëvajtjen e punës së kuvendit. “Delegatët janë nisur nga shtëpia me vota në dorë”, ka thënë në kushte anonimiteti një anëtari i LDK-së.
