Instituti i Statistikave Kombëtare të Shqipërisë, INSTAT, përmes të dhënave të fundit ka njoftuar se vendi po vazhdon të tërheqë një numër gjithnjë e më të lartë vizitorësh të huaj, duke konfirmuar pozicionin e saj si një nga destinacionet më të preferuara turistike në rajonin e Ballkanit.
Sipas këtyre të dhënave, për muajin shtator 2025, në territorin e Shqipërisë kanë hyrë 1.965.601 shtetas shqiptarë dhe të huaj, një rritje prej 9,5% krahasuar me të njëjtën periudhë të vitit 2024. Vetëm shtetasit e huaj që kanë hyrë në vend numërohen 1.259.684, çka tregon një rritje me 9,9% nga viti i kaluar, transmeton albinfo.ch.
Në të njëjtën periudhë, 2.127.386 shtetas janë larguar nga territori shqiptar, ndërsa numri i daljeve të turistëve të huaj ka arritur në 1.354.731, me një rritje prej 10,2%.
Sipas statistikave, 95% e hyrjeve të shtetasve të huaj vijnë nga rajoni i Evropës, ku Evropa Jugore zë 69% të hyrjeve, e ndjekur nga Evropa Perëndimore (12%) dhe Evropa Qendrore/Lindore (11%), shkruan ATSh.
Sa i takon qëllimit të hyrjes në vendin tonë të shtetasve të huaj, në 98% të rasteve është për qëllime personale. Në shtator 2025, ky tregues ka shënuar një rritje me 9,8%, krahasuar me shtator 2024.
