Për të tretin vit radhazi, Shqipëria ka qenë pjesëmarrëse në Kampionatin Botëror të Degustimit të Verërave, që u zhvillua më 3 dhe 4 tetor në kështjellën historike “Fort des Rousses”, në rajonin francez të Jurës, i njohur për traditën e tij të hershme të verës.
Ministri i Turizmit, Kulturës dhe Sportit, Blendi Gonxhja, bëri të ditur se ky aktivitet përbën një mundësi të rëndësishme për promovimin e verës shqiptare, turizmit dhe kulturës sonë mikpritëse në arenën ndërkombëtare.
“Nën drejtimin e somelierit franko-shqiptar, Serxhio Prelashi, ekipi ‘Team Albania’ përfaqësoi me dinjitet trashëgiminë e verës shqiptare dhe potencialin turistik të vendit. Përmes kësaj pjesëmarrjeje, u sollën në vëmendje kantinat dhe destinacionet më të njohura të verës në Shqipëri,” deklaroi ministri Gonxhja.
Gjatë eventit, u prezantuan verëra autentike shqiptare që kanë fituar emër në tregun vendas dhe atë ndërkombëtar. Produktet u vlerësuan si shembuj të zhvillimit të qëndrueshëm të turizmit të verës, një sektor që po njeh rritje të vazhdueshme dhe tërheq gjithnjë e më shumë vizitorë vendas e të huaj.
Në fjalën e tij, ministri Gonxhja theksoi se turizmi i verës mbetet një ndër prioritetet strategjike të qeverisë për të zgjeruar ofertën turistike dhe për të zgjatur sezonin, në përputhje me vizionin e zhvillimit të qëndrueshëm dhe promovimit të produkteve vendase me vlerë të shtuar.
