Elon Musk tha të enjten se ka gjetur një CEO të ri për të marrë drejtimin e Twitter-it, disa muaj pasi ai premtoi për herë të parë të tërhiqej nga roli.
CEO i ri do të marrë rolin në Twitter, i cili kohët e fundit ndryshoi emrin në X Corp, në javët e ardhshme, tha Musk. Ai nuk i tregoi emrin. Megjithatë, Wall Street Journal raportoi – duke cituar burime – se Linda Yaccarino, drejtuese e reklamave në NBCUniversal, ishte në bisedime për këtë punë.
“I ngazëllyer të njoftoj se kam një CEO të ri për X/Twitter. Ajo do të fillojë pas 6 javësh!” tha Musk në një postim në Twitter.
Musk, i cili ka pasur një mbretërim kaotik si “Chief Twit” që kur bleu kompaninë në tetor, tha se ai do të bëhet kryetar ekzekutiv i Twitter dhe shefi i teknologjisë, duke mbikëqyrur produktin, softuerin dhe operacionet e sistemit.
