Megjithëse është 108-vjeçare, polakja Wanda Zarzycka nuk e ka fare problem të luajë ende në piano, madje këtë e bën me pasion.
Gishtat e saj lëvizin shpejt dhe me mjeshtëri, ndërsa rrudhat në duart e saj janë e vetmja gjë që e tregon moshën e saj.
Pianoja prej druri, e përcjellë tek ajo nga nëna e saj, e cila e mori atë si dhuratë për martesë, është posedimi më i vlefshëm i Zarzyckas në një apartament të vogël në Krakovë të Polonisë, shkruan reuters, transmeton albinfo.ch.
Zarzycka, një nga banoret më të vjetra dhe më të talentuara të Polonisë, është një ish-balerinë që u dashurua me muzikën si vajzë e re që u rrit në Lviv, tani në Ukrainën perëndimore, qytet që ende kujtohet me dashuri.
Përkundër vështirësive dhe pengesave që ajo ka hasur, duke përfshirë edhe thyerjen e krahut në moshën 80-vjeçare, 108-vjeçarja energjike vazhdon të luajë çdo ditë.
Mjekët i kishin thënë se ajo kurrë nuk do të luajë përsëri në piano.
Tani ka më shumë se një shekull jetë dhe Zarzycka gëzon shëndet të mirë.
