Policia e Kosovës ka konfiskuar rreth një milion dollarë amerikanë, në bankënota që dyshohet se janë të falsifikuara.
Në një operacion të forcave të policisë janë arrestuar pesë persona nga rajoni i Gjilanit dhe Prishtinës, te të cilët janë gjetur edhe pajisje, të cilat dyshohet se janë përdorur për prodhimin e këtyre parave false.
Me urdhër të prokurorit në Gjykatën e Qarkut në Prishtinë, të dyshuarve u është caktuar ndalimi policor.6
Drejtori i përgjithshëm i Policisë së Kosovës, Shpend Maxhuni deklaroi se hetimet rreth këtij rasti kanë zgjatur disa muaj dhe ka rezultuar të jetë mjaft i suksesshëm.
Hetimet lidhur me rastin janë zhvilluar në Gjilan dhe Prishtinë dhe kanë arrestuar pesë persona me dyshimin që kanë kryer veprën penale, falsifikim i parasë dhe krim i organizuar dhe janë konfiskuar 980 mijë dollarë.
Sipas policisë, paratë janë të një “kualiteti të lartë” dhe mirë të sofistikuara.
“Gjatë kontrollimit te dy të dyshuarit e parë, janë gjetur dhe konfiskuar 980 mijë dollarë amerikanë të falsifikuar, e të cilat para dyshohet se janë prodhuar në shtypshkronjën “Verona” në Prishtinë, pronë e të dyshuarit R.L”, thuhet në një komunikatë të Prokurorisë.
Hetimet për këtë rast do të vazhdojnë nën autorizimet dhe mbikëqyrjen e Prokurorisë së Qarkut në Prishtinë.
