Drejtori i Zyrës për Kosovën në Qeverinë e Serbisë, Marko Gjuriq, pritet të dërgohet në Merdare e më pas të dëbohet nga Kosova.
Ky është lajmi i fundit, pas arrestimit të Gjuriq nga Policia e Kosovës pasi shpërfilli paralajmërimin e organeve kosovare për mos-futje në territorin e Kosovës, përcjell albinfo.ch.
Gjuriq në fillim dërgohet në gjykatë e më pas dërgohet në Merdare, në pikën kufitare me Serbinë.
Ministri i Punëve të Brendshme, Flamur Sefaj, e ka komentuar arrestimin e Marko Gjurqit, shef i Zyrës për Kosovën në Qeverinë serbe.
“Njësitet Speciale të Policisë së Kosovës e kanë përmbyllur në mënyrë profesionale planin operacional për ndalimin e hyrjes së zyrtarëve serb në Republikën e Kosovës të cilëve nga Prishtina zyrtare nuk iu është dhënë leja për të hyrë në shtetin tonë. Policia e Kosovës është përkushtuar për t’i kryer me përgjegjësi obligimet ligjore të tyre dhe për të krijuar një ambient të sigurtë për të gjithë qytetarët e Republikës së Kosovës”.
Ndërkohë, situata raportohet se është e qetë në Mitrovicë dhe në Prishtinë.
