Gara për Prishtinën pa dyshim se ishte gara më e nxehtë e Zgjedhjeve Lokale të 22 tetorit.
Por, kjo garë për kryeqytetin e Kosovës do të vazhdojë, sepse Shpend Ahmeti nga Lëvizja Vetëvendosja dhe Arban Abrashi nga LDK-ja do të masin edhe njëherë forcat në balotazh, përcjell albinfo.ch.
Sipas rezultateve preliminare të KQZ-së, tashmë kur janë numëruar 90.25 të votave, del se Shpend Ahmeti ka fituar 43,42 %, derisa Arban Abrashi 35,91%.
I treti në garën për kryeqytetin është Selim Pacolli nga AKR-ja me 10,24%, pasuar nga Lirak Çelaj me 5,86% e Arbër Vllahiu me 3,27 %.
Gara për balotazh do të mbahet më 19 nëntor. Kujtojmë që Ahmeti ishte zgjedhur kryetar i Prishtinës, duke fituar pikërisht në balotazh katër vjet më parë ndaj Is Mustafës së LDK-së.
Ahmeti dhe Abrashi kanë thënë se ende është herë për koalicione, kurse LDK-ja e ka përjashtuar mundësinë me PDK-në, kurse Selim Pacolli i AKR-së ende nuk është i vendosur se për kë do të bëj ‘tifo’ në balotazh, pasi ai ka fituar rreth dhjetë për qind të votave, që mund të jenë vendimtare në garën për kryeqytetin e Kosovës.
