Uji mund të ishte një mjet për forcimin e bashkëpunimit dhe paqes. Këtë e ka thënë veç tjerash ministri zviceran i punëve të jashtme, Didier Burkhalter, në fjalën e tij të hapjes së punimeve të Konferencës ndërkombëtare të ujit, që po mbahet në Astana, Kazakistan.
Siç bën të ditur Ministria e Jashtme në një komunikatë të saj Zvicra e ka iniciuar këtë konferencë, para tri vitesh. Ajo këtë e ka vendosur në kuadrin e iniciativës “Blue Peace” (Paqja e kaltër) për të mbështetur vendet si: Kazakistani, Kirgizistani, Uzbekistani, Taxhikistani dhe Turkemnistani në menaxhimin e ujërave dhe në këtë mënyrë edhe në shuarjen e konflikteve regjionale.
Në të njëjtën kohë ky bashkëpunim shërben për këmbimin e të dhënave teknike si dhe për promovimin e arsimimit të të rinjve të angazhuar në lëmin e ujërave.
Ministri Burkhalter po ashtu ka debatuar me të rinj dhe të reja në pavijonin zviceran të “Expo 2017” lidhur me vizionet e të ardhmes për ujërat.
Deti Aral, pothuajse plotësisht i shterur, tregon për pasojat e qasjes së paqëndrueshme me ujin në regjionin e Azisë Qendrore. Kjo është arsyeja për të cilën Zvicra mbështet këtë regjion me iniciativën “Blue Peace” Central Asia 2017-2020”.
