Boksieri shqiptar, Robin (Haxhi) Krasniqi është nominuar ndër boksierët më të mirë të vitit 2016 në Gjermani. Kështu e ka vlerësuar boksierin junikas revista më e madhe e boksit në Gjermani “Box Sport”, njofton “albinfo.ch”.
Revista kishte hapur një sondazh ku lexuesit mund të votonin për boksierin e vitit 2016. Në kategorinë “Profis nacional” Krasniqi bënte pjesë bashkë me emrat më të njohur të boksit si: Wladimir Klitschko, Arthur Abraham, Jürgen Brähmer, Marco Huck, Jack Culcay, Dominic Bösel, Tyron Zeuge, Vincent Feigenbutz, Leon Bauer …
Lajmin për këtë vlerësim e kishte shpërndarë edhe vet boksieri Krasniqi në profilin e tij në “Facebook”.
Krasniqi ishte boksieri shqiptar me i suksesshëm për vitin 2016. Dy fitoret e arritura këtë vit kundër kundërshtarëve Cagri Ermis dhe Jurgen Doberstain dhe dy titujt e vlefshëm WBA dhe WBO Inter-Continental, sollën Krasniqin në pozitën 3 në WBO.
Krasniqi së shpejti do të ngjitet në ring përballë boksierit numër 2 në WBO, Arthur Abraham. Dueli për kategorinë super të mesme ndërmjet këtyre dy boksierëve do të vendoset me 4 janar në Budapest të Hungarisë.
