Zvicerani David Branderberger (46) në korrik të vitit të kaluar me një biçikletë me tri rrota, me ndihmën e fuqisë diellore, ka nisur një turne nëpër botë dhe sot ai mbërriti në destinacionin turistik turk Fethiye, në bregdetin e Mesdheut, raportojnë mediet turke, përcjell albinfo.ch.
Aventurieri i pasionuar, Branderberger, me biçikletën me tri rrota në korrik të vitit të kaluar u nis nga Zvicra dhe në muajt e fundit ka udhëtuar nëpër Republikën Çeke, Holandë, Gjermani, Sllovaki, Hungari, Rumani, Bullgari dhe Greqi.
Automjeti i tij është duke lëvizur me energji elektrike, me të cilën furnizohet nga panelet diellore të montuara në pjesën e pasme të triçikletës.
Në një intervistë me gazetarët, Brandenberger tha se ka në plan të vazhdojë rrugën për në Antalia dhe është i kënaqur me mbledhjen e fotografive që kishte bërë gjatë turneut me biçikletën me tri rrota.
Brandenberger kishte thënë se ishte inspiruar nga ideja e miqve të tij nga Çekia, të cilët tre vjet më parë me një mjet të ngjashëm kishin udhëtuar nga Franca në Kazakistan.
Në pyetjen se cili është destinacioni i tij i fundit, ai tha se do të udhëtojë nëpër botë, derisa do t’i funksionojë biçikleta me tri rrota.
