Derisa afati kalimtar i janarit për futbollistë është afër përfundimit, e ardhmja e Shkëlzen Gashit vazhdon të mbetet ende në pikëpyetje. Mediet në Shqipëri e Itali thonë se futbollisti i Bazelit është në prag të kalimit në Seria A, përkatësisht në Torino apo Sampdoria, ndërsa ato zvicerane sot japin lajmin për një transferim të mundshëm drejt SHBA-së apo Kinës.
E përditshmja zvicerane “Blick”, shkruan sot se sulmuesi i Kombëtares Shqiptare pritet të transferohet përtej kontinentit të vjetër. Dy herë golashënuesi më i mirë i ekipit zviceran, këtë vit është lënë në stol nga trajneri i ri Fischer, marrëdhëniet me të cilin kanë qenë shpesh të tendosura dhe largimi i tij këto ditë nga kampionët zviceranë duket i sigurt.
“Blick” shkruan se 27 vjeçari nuk ka qenë i pranishëm me skuadrën në ndeshjen miqësore që Bazeli luajti me Austrinë e Vjenës dhe arsyeja kryesore ka qenë një udhëtim i tij jashtë vendit për të mbyllur një transferim të mundshëm, njofton “albinfo.ch”.
Sipas të përditshmes zvicerane, me shumë gjasa zgjedhja e Gashit do të jetë futbolli amerikan, duke qenë se në të luajnë dhe disa futbollistë zviceranë si Winter dhe Barnetta.
Një gjë duket e sigurt, në rast se Gashi vazhdon të nxeh stolin e ekipit të Bazelit edhe gjatë sezonit të mbetur, gjasat e tij për të qenë pjesë e kombëtares në Euro 2016, janë shumë të vogla!
